NEWS

කාර්යාල සහ කර්මාන්ත ශාලා තුල කොවිඩ් ව්‍යාප්තිය ඉහළයි – වසංගත රෝග විද්‍යා අංශයේ ප්‍රධානි කියයි

වායු සමීකරණ පහසුකම් සහිත කාර්යාල හෝ ස්ථානවල රාජකාරි කටයුතු කිරීමේ දී සැමවිටම සෞඛ්‍ය මාර්ගෝපදේශ අනුව ක්‍රියාකළ යුතු බව වසංගත රෝග විද්‍යා ඒකකයේ ප්‍රධාන වසංගත රෝග විද්‍යාඥ විශේෂඥ වෛද්‍ය සුදත් සමරවීර පවසනවා.

මේ වන විට කාර්යාල තුල කොවිඩ් -19 වෛරස ව්‍යාප්තිය වැඩි වශයෙන් පෙන්නුම් කරනු ලබන බවයි වෛද්‍යවරයා වැඩිදුරටත් සඳහන් කර සිටියේ.

“යම් විදියකින් පුද්ගලයෙක් ජනෙල් දොරවල් වහලා තියෙන කුඩා කාමරයක ඉන්නවා නම්, විශේෂයෙන්ම වායු සමීකරණය කරලා තියෙන තැනකදී මේ රෝගය තවත් අයෙකුට ව්‍යාප්ත වෙන්න, වැළඳෙන්න තියෙන හැකියාව වැඩියි. ඒ නිසා ඒ වගේ ස්ථානවල අපි නිර්දේශ කරනවා පුළුවන් හැම අවස්ථාවක ම ජනෙල් දොරවල් විවෘතව තබන්න කියලා.

ඒ වගේම තමයි ඒ වගේ ස්ථාන කාර්යාලයක දී පවා අපි තනියම නෙමෙයි නම් කාමරයේ ඉන්නේ අනෙක් අය මුණ ගැසෙන විටත් හමුව කතා බහ කරන විට මුව ආවරණ නිතර පැලඳ සීටීම ඉතාම වැදගත්. එවැනි ස්ථානයක රාජකාරියට ගිය වහාම තමන්ගේ අත් සබන් දා පිරිසිදු කළ යුතුයි. ඒ වගේම ආයතනයෙන් පිටතට යෑමේ දී ද අත් සේදීම ඉතා වැදගත්. ” වසංගත රෝග විද්‍යා අංශයේ ප්‍රධානියා කියා සිටියා.

මේ අතර යම් පුද්ගලයෙකුට කොවිඩ් රෝග ලක්ෂණ පෙන්නුම් කරන්නේ නම් වහාම සෞඛ්‍ය අංශ දැනුවත් කොට රෝහල් ගතවීම වැදගත් බවද ඔහු පෙන්වා දෙනවා.

“ඇතැම් අවස්ථාවලදී රෝගී භාවයෙන් යුත් පුද්ගලයින් විවිධ අත්බෙහෙත් සහ ඖෂධ භාවිතා කිරීමට පෙළඹී සිටින බවට වාර්තා වනවා. මෙය සිදුනොකළ යුතු දෙයක්. ඒ නිසා කොවිඩ් රෝග ලක්ෂණ පෙන්නුම් කරන අවස්ථාවක එම පුද්ගලයින් වහාම සෞඛ්‍ය බලධාරීන් දැනුවත් කොට වෛද්‍ය ප්‍රතිකාර සඳහා යොමු වීම අත්‍යවශ්‍ය දෙයක්” විශේෂඥ වෛද්‍ය සුදත් සමරවීර කියා සිටියා.

මේ වන විට මෙරට තුල ව්‍යාප්තවෙමින් තිබෙන නව ක්‍රමවේදය ඉතා වේගයෙන් සම්ප්‍රේෂණය වීමේ හැකියාවක් පෙන්නුම් කරන බැවින් මහජනතාව නිරන්තරයෙන් යහපත් සෞඛ්‍ය උපදෙස් අනුගමනය කරමින් සිටීම වැදගත් බවයි වසංගත රෝග විද්‍යා ඒකකයේ ප්‍රධානියා ප්‍රකාශ කර සිටියේ.

බෝ නොවන රෝග හෝ වෙනත් රෝග සඳහා ප්‍රතිකාර ලබාගැනීමට රෝහල් වෙත පැමිණ එය පාලනය කර ගත යුතු බවත් එහිදි සෞඛ්‍ය උපදෙස් නිසි ලෙස පිළිපැඳිය යුතු බවද විශේෂඥ වෛද්‍ය සුදත් සමරවීර මාධ්‍ය හමුවකට එක්වෙමින් වැඩිදුරටත් කියා සිටියේ.